Fambolena : Voamarina ny fahombiazan’ny masomboly katsaka « Marobaby & Miaritra » sy tsaramaso « Ran’Omby 5 & Ikinimba »
Mitohy hatrany ny fikarohana momba ireo masomboly mety amin’ny toe-tany eto Madagasikara amin’ny alalan’ny tetikasa Foodsec Semence. Navoaka tamin’ny fomba ofisialy kosa fa efa misy ny vokatra ary ny masomboly tsaramaso sy katsaka no nahazoana izany. Natolotra tamin’ny fomba ofisialy, omaly, ireo masomboly ireo.
Hampitomboana ny vokatra
Tanjon’ny firenena rehetra miara-miasa ao amin’ity tetikasa ity ny hamokatra masomboly tsara kalitao sy mahavokatra bebe kokoa noho ireo efa mahazatra. Izany no nanatanterahana ny fikarohana samihafa. Naharitra efatra taona ny asa fikarohana niarahana tamin’ny CIRAD, FOFIFA, SOC ary FIFAMANOR, ka voaporofo fa mahomby ireto masomboly ireto. Nahitam-bokany ny masomboly tsaramaso, izay misy karazany roa dia ny « Ran’Omby 5 » sy « Ikinimba FOFIFA ». Toy izany ihany koa ny katsaka, ahitana ny « Marobaby » sy « Miaritra ». Nanamafy ny avy ao amin’ny Minisitera fa raha teo aloha dia 600 hatramin’ny 800 kg/ha ny vokatra tsaramaso, fa miaraka amin’ireto masomboly vaovao ireto dia vinavinaina hahatratra 2T/ha ny vokatra.
Isan’ny tanjona ao anatin’izany ihany koa ny ady amin’ny tsifanjarian-tsakafo. Hampitomboana ny vokatra mba ho tombontsoan’ny rehetra. Manamafy izany ny teny manentana amin’ity asa fikarohana ity, dia ny « Fanamafisana ny Fanavaozana sy Fikarohana ho an’ny Fahavitan-tena ara-tsakafo eto Madagasikara ».
Mamaly ny filàn’ny tantsaha
Zava-dehibe ihany koa io fiaraha-mientan’ny mpikaroka, ny mpamokatra, ny fikambanana ary ny mpiara-miombon’antoka io, mba hanamafy ny famokarana sy hampiroborobo ny fambolena maharitra
Tsara mantsy ny manamarika fa isan’ny nojerena tao anatin’ity fikarohana ity ny faharetan’ireo masomboly ireo amin’ny karazana toetr’andro samihafa eto Madagasikara. Nanamafy ny Talen’ny Kabinetran’ny MINAE fa mamaly ny filàn’ireo tantsaha ireto masomboly vaovao ireto. Hitondra voka-tsoa ara-pahasalamana, mahomby ara-pamokarana, ary afaka miatrika ny fiovan'ny toetr'andro, ny aretina ary ny bibikely mpanimba ny voly, izy ireo. Manamarika izany fa miroso amin’ny dingana fampivoarana ny fambolena ity fikarohana ity. Tafiditra ao anatin’ny fandaharan’asa SANOI, tohanan’ny Vondrona Eoropeana, ary fiaraha-miasa amin’ny MINAE, MESUPRES ary FOFIFA, ny famoahana ireto masomboly ireto.
