Fotodrafitrasa : Mampiasa teknolojia hanatsarana ny mpisehatra amin’ny asa vaventy

Manamarika ny dingana farany amin'ny tetikasa novolavolaina hanohanana ny fifandraisana sy ny fitaterana (PACT), izy io. Ny minisiteran’ny Asa vaventy no mitarika izany sady nataony hanatsarana ny lafiny fotodrafitrasan’ny lalana.

Fitaovana entina hanatsarana ny fotodrafitrasa

Entina hanofanana sy hampitombo traikefa ireo injeniera sy teknisianina amin'ny fampiasana ny fitaovana "geo-infrastructure" ity atrikasa ity. Izany no hatao mba hanatsara ny fidinana an-tsehatra. Raha tsiahivina dia azo lazaina ho mora simba avokoa ny fotodrafitrasan’ny lalana sy ny tetezana maro eto Madagasikara. Ho fanarenana izany no hampiasana ity fitaovana ity. Ny tanjona amin’izany dia ny hiantohana ny kalitao sy ny faharetan'ny fotodrafitrasa.
Hanavao ny asa fanarenena ireo asa vaventy manerana ny Nosy ny fampiasana ity teknolojia ity. Hiantehatra kokoa amin’ity « geo-infrastructure » ireo ny fanatanterahana ny asa, manomboka amin’ny faharetany sy ny fitantanana ny fitaovana ilaina isan-karazany.

Fanavaozana ny sehatra ny asa vaventy

Efa nanomboka tamin'ny volana aogositra 2022 ity tetikasa PACT ity. Nizara dingana telo lehibe izany. Ny dingana voalohany dia ny famerenana amin'ny ankapobeny ny « geoportail », niaraka tamin'ny fanaraha-maso hentitra sy ny fanadihadiana teny anivon’ireo nampiasa azy. Ny dingana faharoa dia nahafahana nanatsara ny fitaovana “geo-infrastructure”, tamin’ny fampidirana ireo angon-kevitra vaovao momba ny lalana sy ny fotodrafitrasa efa misy. Nisy ihany koa ny fanavaozana ireo torolalana ara-teknika amin’ny fampiasana azy. Farany tamin’izany na dingana fahatelo ny hahafahana mahazo fitaovana tena ilaina, toy ny solosaina finday, tablette ary « powerbanks », mba hahafahana manangona tsy tapaka ny fiovana mety hisy eny an-kianja.