Takaitra navelan’i Jude : Tranom-panjakana avokoa ny 70%-n’ireo tra-pahavoazana any Ampanihy

Fahasimban’ny fotodrafitrasa

Mbola eo am-panangonana ny antontan’isa, momba ny takaitra navelan’ilay rivodoza ny BNGRC, miaraka amin’ireo mpiara-miombona antoka rehetra. Raha ny antontanisa tamin’ny datin’ny 16 martsa 2025, dia 409 no isan’ny olona traboina tao Ampanihy Andrefana, noho ny rivodoza Jude. Nahitana fahasimbana ihany koa ny fotodrafitrasa. Araka ny tatitra voaray, taorian’ny fidinan’ny BNGRC sy ny tomponandraiki-panjakana tany an-toerana, dia tranom-panjakana avokoa ny 70% tamin’ireo tra-pahavoazana. Ny sekoly, ny hôpitaly, ny tranon’ny Distrika, hatramin’ny tafon’ny tranon’ny BNGRC, dia niendaka avokoa, hoy ny Jeneraly Elack Olivier Andriakaja. Ankoatra izay dia tapaka ny lalana mampitohy an’Ampanihy, ao Beahitse, izay lalana hahafahan’ireo kamiao mitondra ny fanampiana ho an’ireo traboina.

Fitadiavam-bahaolana maika

Efa misy ny fitadiavam-bahaolana, mba tsy hampitoka-monina ny Distrikan’Ampanihy Andrefana, ka efa nisy fiara mpanamboatra lalana nalefa, hanokatra ny lalana handehanan’ireo kamiao, araka ny nambaran’ny tale jeneralin’ny BNGRC. Tombanana ho efa azo ifamezivezena izany, androany ihany na rahampitso. Efa nitady vahaolana momba ny famatsiana herinaratra ihany koa ny BNGRC, noho ny mbola tsy fisian’ny jiro mandeha any an-toerana. Etsy an-daniny, efa natomboka ny fizarana fanampiana ho an’ireo traboina.

Tsy ny any amin’ny Distrikan’Ampanihy ihany anefa no niharam-pahavoazana vokatry ny rivodoza Jude, fa toerana maro any atsimon’ny Nosy. Ny ao amin’ny distrikan’i Toliara II, ohatra, dia mbola tsy afaka mianatra ny mpianatra, raha ny ao amin’ny kaominina Betsinjaka manokana. Maro ireo toerana dobo rano sy ireo lalana tapaka.