Famonjena ireo traboina : Mila tohana ireo fikambanana misehatra amin’ny maha-olona, hoy ny ACF
Miantraika amin’ny fanampiana entin’ireo fikambanana iraisam-pirenena ho an’ireo olona traboina, ny fihenan’ny tohana avy amin’i Etazonia. Isan’ny mahatsapa izany ny fikambanana tsy miankina, Action Contre La Faim (ACF), izay isan’ny tohanan’ny amerikanina amin’ny ampahany betsaka.
Tohana ara-bola maika ho an’ny mpiara-belona
Olona miisa 8 99 890 isa no traboina vokatry ny fandalovan’ilay rivo-doza Honde tany amin’ny tapany atsimo andrefan’i Madagasikara, araka ny tatitry ny Birao nasiônaly misahana ny fitantanana ny Tandindon-doza sy ny Loza (BNGRC), tamin’ny datin’ny 4 martsa 2025. Namoizana ain’olona 8 ihany koa ny fandalovan’ity andro ratsy ity teto amintsika. Isan’ny mandray anjara amin’ny fanampiana ireo olona niharan’ny voina ny ONG ACF, na tamin’ny fotoana nifindran’izy ireo monina teny amin’ny toby fandraisana traboina vonjimaika, na ho fanohanana azy ireo amin’ny fiarenana taorian’ny loza. « Manampy ny BNGRC amin’ny fanombanana ny takaitra navelan’ny loza ireo ekipa eny an-kianja, amin’ny alalan’ny fangalana sary amin’ny « drone ». Nanolotra fitaovana fototra ilaina maika ihany koa izahay, nananganana ivon-toerana fandraisana ny traboina ary koa ho fanarenana ny fiantsonan’ny fiaramanidina ao Ampanihy. Nanampy anay tamin’izany ny ECHO (hetsiky ny Vondrona Eoropeanina ho fanampiana ny mpiara-belona. ndlr) sy ny Start Network (vondron’ireo fikambanana miasa ho an’ny maha-olona. ndlr) », hoy i Grégoire Brou, talen’ny Action contre la Faim eto Madagasikara.
Tsy ampy ny famatsiam-bola
Eo anatrehan’ny fahavoazana misy anefa, izay vao niampy indray, noho ny rivo-doza Jude izay vao nandalo tamin’ny herinandro lasa teo, dia mahatsapa ny ACF, fa tsy ampy ny famatsiam-bola ahafahana manohana ireo olona traboina. Be dia be ny takaitra navelan’ireo rivo-doza, ka ankoatra ny famonjena ny maha-olona dia marobe koa ny fotodrafitrasa mila arenina : lalana tapaka, tsy fahampian’ny rano fisotro madio, tanimbary dobo rano… Vao mainka ireo nanampy trotraka ny efa fahasahiranana iainan’ny mponina, indrindra ny any Atsimo, izay efa miaina tsifanjariantsakafo mafy. « Tena mila fanampiana ireo mponina an’arivony maro any atsimon’i Madagasikara, indrindra ny vehivavy sy ny ankizy. Ny 42% amin’ireo asa ataonay dia tohanan’ny famatsiam-bola amerikanina. Araka izany dia voatery natsahatray ny tetikasa maro nataonay ho setrin’ny tsifanjariantsakafo any Atsimo. Izany fiatoan’ny fanampiana izany dia tsy mamela anay hanatanteraka intsony ny asa maika tena ilaina amin’izao fotoana izao sy amin’ny ho avy, kanefa mbola ao anatin’ny vanim-potoanan’ny rivo-doza isika izao », hoy ny nambaran’i Grégoire Brou.
Araka izany, miantso ny fandraisan’anjara ara-bola misimisy kokoa avy amin’ny mpiara-miombona antoka rehetra, na ny Fanjakana, na ny sehatra tsy miankina, na ny fikambanana isan-karazany ny ACF, mba hahafahana mamaly ny fanampiana tena maika ilain’ireo olona traboina.
