Foloalindahy : Niampy 29 mianadahy ireo manamboninahitra mpitsabo hiantsehatra

Nitarika sy nanome voninahitra ny lanonana tamin'izany ny Tale Jeneralin’ny Rantsamangaikan’ny Fiarovana (Directeur Général des Organismes de Défense # DGOD) ao amin'ny Minisiteran'ny Foloalindahy, ny solontenan’ny Minisitra sy ny Tale Jeneralin'ny CENHOSOA, ny Talen’ny DCSSM ary ireo tompon’andraikitra maro isan-tsokajiny eo anivon’ny Tafika malagasy.

Handray an-tanana mivantana ireo miaramila

Nanampy ny fianarana ara-teorika ny fampiharana notanterahina teny anivon’ny Hôpitaly miaramila etsy Soavinandriana (CENHOSOA) sy ny tao amin’ny « Formations Spéciales des Forces Armées » Antananarivo. Araka izany afaka handray an-tanana mivantana ireo miaramila miantsehatra eny an-kianja izy ireo taorian’izao famoahana izao. Izany ihany koa ny fahalalana nohamafisina nandritra ny enim-bolana nianarana. « Manana ny traikefa sy ny fahaiza-manao amin’ny maha miaramila sy maha dokotera ireto miaramila mpitsabo ireto noho ny fizaran’asa sy ny fikarohana fahalalana tao amin’ny sampandraharaha « chirurgie cérébrale et vasculaire » sy tao amin’io « Formations Spéciales des Forces Armées », io », hoy ny fanazavana. Raha tsiahivina dia ireto mpitsabo miaramila ireto ihany no mitsabo eny an-tsehatra eny raha misy ny loza mety hiseho amin’ireo miaramila miasa. Tafiditra ao anatin’izany ny tafika an-tanety, an-dranomasina sy an’habakabaka.
Toy ny mpitsabo rehetra dia efa manana ny fahaiza-manaony amin’ny sehatry ny fitsaboana izy ireo no sady manana fahaiza-manao amin’ny maha-miaramila ihany koa. Isan’ny fototra ilain’izy ireo amin’ny fidinana an-tsehatra io farany io, indrindra rehefa fotoan’ny fifandonana mahery vaika.
Raha ny fanazavana dia mbola tsy ampy ny filàna manerana ny Nosy, ny isan’ireo manam-boninahitra mpitsabo amin’izao fotoana izao.