Fandriampahalemana : Hiampy 1 196 ireo zandary hidina an-kianja manomboka izao
Navoaka tamin’ny fomba ofisialy ny faran’ny herinandro lasa teo tao amin’ny sekolin’ny Zandarimaria Ambositra ny zandary mpiana-draharaha miisa 1196 mianadahy. Misalotra ny anarana JORO ireto andiany faha 78 ireto. Hiampy indray araka izany ny zandary hamita ny iraka sy ny adidy napetraka aminy. Ao anatin’izany ny fiantohana ny fandriampahalemana sy ny filaminana an-tanandehibe sy eny ambanivohitra.
Hidina eny an-kianja
Tonga nanatrika ny famoahana ireto mpiana-draharaha ireto ny Jeneraly Andry Rakotondrazaka, minisitra Delege misahana ny Zandarimaria. Nantitranteriny tamin’ireto Zandary vaovao ireto ny tarigetra sy ny teny filamatra napetrany dia ny hoe Zandarimaria MAFI Miaro ho Antoky ny Fampandrosoana Ifotony. Ho zandary manakaiky vahoaka tokoa izy ireo ary ho modely eo anivon'ny fiaraha-monina. Izany no hafatra mafonja nomeny azy ireo, entiny indrindra hanatanterahany ny asa sy ny fizaranasa miandry azy ireo aorian’izao fiofanana tao amin’ny EGNA ((Ecole de la Gendarmerie Nationle à Ambositra) izao. Handeha hiparitaka eny amin’ireo CSAO na ny Centre Spécial d’aguerrissement Operationnel izy ireo afaka 15 andro. Nafarana ihany koa izy ireo ny amin’ny fitondran-tena sy ny fanarahana ny fitsipim-pifehezana izay mifantoka amin’ny tarigetran’ny Zandarimaria : Tanindrazana sy Lalana, rehefa handeha hiparitaka manerana ny Nosy izy ireo.
Fitokanana fotodrafitr’asa
Nifanindrandalana tamin’ny famoahana tamin’ny fomba ofisialy ny andiany faha 78 mpianatra ho zandary ihany koa ny fitokanana fotodrafitrasa vao nahorina ao amin’ny EGNA. Tao anatin’izany ny trano fatorian’ny mpianatra miisa 2 izay ahitana efitrano fatoriana 8 miaraka amin’ny farafara sy kidoro, mahazaka mpianatra 200 isanisany. Teo ihany koa ny trano fianarana miisa 3, misy efitrano 09. Fanampin’izany ny birao ho an’ny komandin’ny fiofanana (commandant de cours) sy trano fisakafoanan’ny mpianatra. Natsangana mba hanatsarana sy hampiakarana ny lentan’ny fiofanana ao amin’ny EGNA izany fotodrafitrasa izany. Ilaina rahateo izany raha efa eo am-panomanana ny fandraisana ireo mpianatra ho zandary andiany faha 79 hiatrika ny fiodinana faharoa ihany koa ny EGNA amin’izao fotoana izao.
