Solon-dronono lasa be rano loatra : inona no mety ho vokadratsiny ?
Mila hajaina tsara ny torolalana mikasika ny fikarakarana ny solon-dronono. Anisan’ireo mila tandremana ny fatran’ny rano hanapohana ny vovon-dronono. Mety hitera-doza eo amin’ny zazakely ny fanapohana rano be loatra, mihoatra ny tokony ho izy ny solon-dronono. ‘Ndeha ho resahana eto ireo tsara fantatra mikasika izany.
Inona no antony tsy atahorana manapoka rano ny solon-dronono omena ny zaza ?
Amin’ny ankapobeny dia miendrika vovon-dronono ny solon-dronono natokana ho an’ny zazakely. Mba hampatsora azy io moa dia mila tapohana rano izy. Ny rano irery ihany nefa no « liquide » afaka hampiasaina amin’ny fanapohana ny solon-dronono. Izy ihany no tsy misy « risques » ho an’ilay zaza. Mila hajaina tsara kosa nefa ny fatra ampiasaina amin’izany. Marihana fa ny rononon-dreny dia rano no mandrafitra ny 87% azy. Ny solon-dronono kosa dia tokony mitahiry rano eo ho eo amin’ny 85% eo. Efa voakajy arak’izany ny ireo « électrolytes » sy otrikaina entin’ny solon-dronono amin’ny rano sahaza azy.
Inona no mety hitranga raha lasa be rano loatra ny solon-dronono ?
Mety hitera-doza eo amin’ny zazakely ny fampisotroana rano azy alohan’ny faha 6 volany. Toy izay ihany koa ny fanapohana rano be loatra mihoatra ny tokony ho izy ny solon-dronono. Mbola kely dia kely ary mbola tsy matoy ny voa (reins) an’ireo zaza menavava sy ireo latsaky ny 6 volana. Noho izany dia mbola tsy afaka misivana rano be loatra ny voan’izy ireo. Ireo rano mihoatra dia lasa manapoka ny sira anatin’ny ràn’ilay zaza ka mahatonga « hyponatrémie » na fidinan’ny tahan’ny sira ao amin’ny vatany. Raha izany no mitranga dia mety miteraka fivontosan’ny atidoha, mampifanintona na koa « intoxation hydrique ». Raha diso ny fatran’ny rano atao anatin’ny biberon dia mety hiteraka fahasarotana ara-pahasalamana eo amin’ny zaza.
Ankoatra izay, raha mihoatra ny tokony ho izy ny rano hanapohana ny solon-dronono omena ny zazakely dia lasa maka toerana be ao anatin’ny taova fandevonan-kanin’ilay zaza io rano be io. Lasa ela kokoa arak’izany vao foana ny ao anatin’ny taova fandevonan-kaniny. Izany hoe ho lasa mora voky kely ilay zaza rehefa misotro solon-dronono na lasa tsy mazoto misotro io ronono io. Lasa tsy hahalany ny fatra tokony ho sotroina izy na lasa malain-komana mihintsy. Izany dia mety hahatonga ilay zaza ho lasa tsy ampy reny na koa tsy fahampiana otrikaina ao amin’ny vatany.
