Ireo fahadisoana mila tandremana rehefa mikarakara tarehy misy mony

Ny fampiasana akora mahery loatra

Maro ireo karazana akora natoraly mety mandaitra amin’ny fikolokoloana ny tarehy misy mony. Tsy azo adino nefa fa misy akora mety mahery loatra ka tsy zakan’ny hodi-tava. Anisan’ireo mila tandremana àry ny :
-Karibonetra, noho izy « alcalin » loatra ka manakorontana ny « pH naturel » ny hoditra. Izany dia mety mahatonga « irritations » eo amin’ny tarehy tsy mahazaka azy ;
-Voasary makirana tsy mitapoka, noho izy « acide » be loatra. Mety lasa mavaivay sy sy mahazaka masoandro ny tarehy misy mony ampiasana azy io ;
-Vinaigre de cidre tsy mitapoka, izay mety mandoro ny hodi-tava sy mahatonga « irritation sévère ».
Ny vahaolana ? Alohan’ny hampiasana akora natoraly eo amin’ny tarehy misy mony dia tsara hatrany ny manandrana azy eo amin’ny faritra kely amin’ny hodi-tava ahitana raha zaka na tsia. Atao amin’ny antonony ny fampiasana azy raha mahazaka ny hoditra.

Ny fanaovana tsirambina ny fahadiovana

Raha tsy madio tsara ny tanana na ny fitaovana ampiasaina hanamboarana ny vokatra natoraly hikarakarana ny tarehy dia mety hitondra bakteria eo amin’ny hoditra sy vao maika hampirongatra ny mony. Alohan’ny hanamboarana ilay vokatra natoraly àry dia sasana tsara amin’ny savony ary kobanina amin’ny rano mafana ireo fitaovana rehetra hampiasaina. Diovina tsara ihany koa ny tanana sy ny hoho tanana vao mikirakira ireo akora sy ny fitaovana. Toy izay ihany koa rehefa hikarakara ny tarehy.

Ny fanaovana « gommage » matetika loatra

Manampy amin’ny fanesorana ireo loto sy hoditra maty eo amin’ny tarehy ny fanaovana « gommage ». Tsy azo atao matetika loatra kosa nefa izany raha manana tarehy misy mony na be mony. Mila tandremana tsara satria :
-Anisan’ireo mety mandratra sy manimba ny hoditra ny « gommage à grain » mahery loatra toy ireo vokatra natoraly misy siramamy, sira, tain-kafe… ;
-Rehefa kosehana matetika loatra amin’ny alalan’ny « gommage » ny hodi-tava dia lasa mamokatra « sébum » betsaka kokoa ka vao maika tsentsina ny mason-koditra ary mirongatra ireo mony.
Tsara àry raha « gommage » malefaka, ohatra vita amin’ny tanimanga na amin’ny « avoine » no ampiasaina ary tsy atao mihoatra ny in-droa isan-kerinandro.