Mitaiza kely : ireo fomba hitsitsiana ny fandaniana ara-bola momba ny zaza

Fitsitsiana ny fandaniana rehefa mitaiza zaza : mampinono

Isan’ireo fandaniana ara-bola tena mavesatra eo amin’ny ray aman-dreny mitaiza kely ny vidin’ny solon-dronono. Lafo vidy tokoa izy ireny nefa dia mahalany boaty maro ny zazakely mandritra ny iray volana. Raha azo atao ary dia nonon-dreny irery ihany no homena ny zaza latsaky ny 6 volana mba tsy hividianana solon-dronono. Sakafo ampy sy mahasalama tsara ny zaza ny rononon-dreny ka tsy misy ahiana ny tsy fanomezana azy solon-dronono.

Mividy akanjo sy fitaovana fripy na hoe « occasion »

Satria ny zazakely dia mitombo vetivety dia voatery mividy akanjo matetika ny ray aman-dreny ao anatin’ny volana vitsy. Mazava ho azy fa mety manavesatra be ny fandaniana ara-bola mikasika ny zaza ny fividianana fitafy vaovao matetika. Ny vahaolana mety dia ny mividy akanjo efa niasa na hoe « occasion ». Ahitana azy ireny eny amin’ny fripy sy eny amin’ireny « vide-dressing » ireny. Ankoatra ny fitafy dia azo atao ihany koa ny manjifa ireo fitaovana ilain’ny zaza, toy ny fanaka natokana ho an’ny zazakely (seza, fandriana…), « poussettes »… eny amin’ireo mpivarotra entana efa niasa ireny. Mora lavitra ny vidin’ireo entana « occasion » raha mihoatra amin’ny vaovao.

Ahena ny fampiasana « produits jetables »

Maro tokoa ankehitriny ny ray aman-dreny mitaiza kely misafidy mampiasa « couches jetables ». Noho izy ireny mora ampiasaina sy mampihena fahasahiranana (tsy mila sasana) moa matetika no antony hisafidianana azy ireny. Marihana nefa fa mandany vola tokoa ny mampiasa « couches » noho izy ireo ampiasaina indray mandeha dia ariana. Mitsitsy ny fandaniana ara-bola kokoa ny mampiasa taty lamba. Vidiana lafolafo izy ireny amin’ny voalohany avy eo afaka ampiasaina imbetsaka. Toy izany ihany koa ny « lingettes ». Afaka asolo « gants de toilette » sy rano izy ireny mba hampihena ny fandaniana ara-bola mikasika ny fitaizana zaza.

Vidiana betsaka na hoe atao « provision » ireo zavatra ilain’ny zaza

Rehefa mividy zavatra ilain’ny zaza amin’ny andavanandro, toy ny solon-dronono, ny « couches » na koa ireo « produits de soin », dia tsara raha vidiana maro indray mandeha isam-bolana izy ireny. Mihena kokoa ny vidin’izy ireo vidiana maro (en gros) raha oharina amin’ny mividy iray. Mazava ho azy fa any amin’ireo fivarotana mivarotra « en gros » no miantsena azy. Raha ny eto an-drenivohitra manokana ohatra dia eny Tsaralalana sy eny Andravoahangy eny no betsaka tranombarotra mivarotra entan-jazakely « en gros ».

Karakaraina ao an-trano ny sakafon-jaza

Rehefa feno 6 volana ny zaza dia efa manomboka misakafo. Maro ireo karazana sakafon-jazakely hita eny amin’ny mpivarotra sy tranombarotra lehibe eny, toy ny lasopy, « purées », « compotes », « céréales », « yaourts »… Lafo vidy tokoa ireny sakafon-jaza efa vonona ampiasaina ireny. Mba hampihena ny fandaniana ara-bola mikasika ny fitaizana zaza dia tsara raha karakaraina ao an-trano ny sakafon-jaza. Azo amboarina ao an-trano avokoa ny ankamaroan’ireo sakafo voalaza teo ireo ary tsy mila akora lafobe ny fanaovana azy ireny.