Mpianatra hiadina « gym BAC » : ireo sakafo manome tanjaka

Akondro

Isan’ireo sakafo tsara omena ny tanora hiatrika « gym BAC » ny androtry ny fanadinana ny akondro. Manankarena otrikaina maro moa ity karazana voankazo ity ka manome ny hery ilaina hiatrehana ny adina ara-panatanjahantena. Vetivety ny fotoana andevonan’ny vatana ny « glucides » sy hanodinana izany ho tanjaka ho an’ny vatana. Manampy amin’ny fisorohana ny « crampes » mandritra ny fanatanjahantena ihany koa ny akondro.

Ny tsaramaso

Manampy betsaka amin’ny fanomezana hery sy fanomanana ny vatana ho amin’ny fiatrehana ny adina ara-panatanjahantena ny fihinanana tsaramaso andro iray mialoha. Ahitana vitamina, mineraly sy « antioxydants » amin’ny tahany ambony ao anatin’izy ireny. Ankoatra izay dia manankarena « potassium », « magnésium » sy « fer » ihany koa ny tsaramaso ka mampiverina haingana ny aina ho an’ireo tanora avy nikotrana.

« Brocoli » sy legioma maitso

Ny legioma rehetra dia mitondra vitamina sy mineraly mampantanjaka ny vatana. Ny « brocoli » sy ireo legioma maitso kosa nefa dia ahitana ireo singa ireo amin’ny tahany ambony kokoa. Ankoatra izay dia mitahiry fibra sy « antioxydants » izay manampy betsaka amin’ny fampitomboana hery izy ireo. Tsara mihinana izany ireo mpiadina hiatrika « gym Bac » mandritra ny andro vitsivitsy alohan’ny fanadinana.

Atody

Sakafo iray isan’ny manankarena otrikaina indrindra ny atody. Mitondra ny fatrana « protéines » ilain’ny vatana mialoha sy aorian’ny fanatanjahantena izy io. Mampiverina ny aina ary mampitony ny fanaintainana amin’ny hozatra rehefa aorian’ny adina ara-panatanjahantena ny fihinanana atody. Ny tamenak’atody no tena tsara hoanina no izy mitahiry « protéines », « zinc » sy vitamina bebe kokoa.