Mora reraka ny atidoha rehefa manao asa kely miverimerina : inona no antony ?
Maro amintsika no mieritreritra fa mora ny manao asa madinika miverimberina satria tsy mitaky hery ara-batana na fahaiza-misaina be loatra. Ny fandaniana ora maro amin’ny fanaovana zavatra mitovy foana (mamaly hafatra mitovy karazana, mameno tabilao, mandamina antontan-taratasy, manao asa miverimberina amin’ny solosaina…) nefa dia mety handreraka ny atidoha. Inona no antony mety mahatonga izany ? Inona no mety fiantraikany ary ahoana ny atao hiarovana ny herin-tsaina ?
Mitaky fifantohana tsy tapaka ny asa kely miverimberina
Na dia toy ny mandeha ho azy aza ny asa iray miverimberina dia mbola miasa hatrany ny atidoha mba hifehezana ny hadisoana, hitazonana ny fifantohana ary hanarahana ireo toromarika ilaina.
Ohatra, ny famakiana mailaka maro mitovy endrika na ny fanaovana peta-kofehy tsotra maro mitovy endrika dia mila fitandremana maharitra. Mandany angovo ara-tsaina izany ka mety hiteraka fahatsapana ho reraka, leo na tsy mazoto.
Tsy ny fahasarotan’ny asa ihany no mampijaly ny atidoha, fa eo ihany koa ny faharetan’ny fotoana izay itakiana azy hifantoka.
Mampihena ny fahavitrihan’ny atidoha ny fahazarana be loatra
Tian’ny atidoha ny zava-baovao, ny fanamby ary ny famahana olana. Rehefa asa mitovy foana no atao, dia mihena ny fampiasana ireo faritra ao amin’ny atidoha mifandray amin’ny fahalianana sy ny faharisihana.
Ny fanaovana asa mitovy hatrany dia mety hahatonga ny olona hiasa toy ny hoe mandeha amin’ny “mode automatique”. Rehefa maharitra izany dia mety hiteraka:
-fahatsapana fahasorenana;
-fahasarotana mifantoka;
-fihenan’ny fahaiza-mamorona;
-fahatsapana hoe miasa be nefa tsy misy fandrosoana hita.
Izany no mahatonga ny olona sasany hahatsiaro tena reraka rehefa avy nanao asa madinika miverimberina mandritra ny andro iray manontolo.
Mampitombo ny havizanana ara-tsaina ny tahotra hanao fahadisoana
Na dia toa tsotra aza ny asa miverimberina dia mitaky fitandremana mafy mba tsy hanaovana hadisoana izy ireny amin’ny ankapobeny. Noho izany, mijanona ho mailo foana ny atidoha. Matetika dia tsy dia tsapa ny fihenjanana ara-tsaina mandritra izany, nefa rehefa mandeha ny fotoana dia mety hiteraka havizanana lalina eo amin’ny atidoha izany.
Mety handreraka ihany koa ny tsy fahatsapana fahombiazana
Antony iray hafa mahatonga ny havizanan’ny atidoha rehefa manao asa madinika miverimberina ny tsy fahazoana fahafaham-po amin’ny asa vita.
Matetika ny olona rehefa mahavita tetikasa lehibe na asa sarotra iray dia mahatsapa fahafaham-po sy rehareha. Rehefa manao asa madinika maro tsy misy vokatra hita maso nefa dia mety hahatsapa izy hoe miasa mafy nefa tsy misy zava-bita lehibe.
Io tsy fahatsapana fandrosoana io dia mety hampihena ny faharisihana ary hampitombo ny havizanana ara-pihetseham-po.
Inona avy ireo famantarana fa reraka noho ny asa miverimberina ny atidoha?
Mety hiseho amin’ny endrika maro ny havizanana ara-tsaina, ka anisan’izany ny:
-fahasarotana mifantoka;
-faniriana haka aina matetika;
-fahasosorana amin’ny zavatra kely;
-fanadinoana zavatra matetika;
-fahatsapana hoe “tsy miasa intsony ny saina”;
-fihenan’ny faharisihana;
-fitomboan’ny fahadisoana na dia efa zatra aza.
Ireo famantarana ireo dia manambara fa mila miala sasatra na mila fanentanana hafa ny atidoha.
