Fahasalamana : Misedra olana maro ireo mpitsabo amin’ny fomba nentim-paharazana
Mankalaza ny andro ho an’ny fitsaboana nentim-paharazana aty Afrika i Madagasikara, androany, izay tanterahina eto Antananarivo. Fotoana handinihana ny paikady hampandrosoana ny sehatra sy hamahana ny olana samihafa amin’izany ny androany. Voalaza tamin’izany fa misedra olana samihafa ireo mpitsabo amin’ny fomba nentim-paharazana ireo.
Lalàna sy fankatoavana
Miisa 10 400 ireo mpitsabo nentim-paharazana mivondrona ao anatin’ny Fikambanana nasionalin’ireo mpitsabo nentim-pharazana Malagasy (ANTM) amin’izao fotoana izao. Voasokajy ao anatin’izany ireo mpampivelona, mpanotra ary mpanao raokandro. Tsy vitsy amin’ny Malagasy ihany koa no manatona azy ireo, mila fanampiana. Raha ny fanazavana anefa amin’izao fotoana izao dia iharan’ny tsy firaharahiana izy ireo. Nanazava i Andriandrainarivo Rasamivelona Séraphin, Filohan’ny ANTM, fa misy amin’ireo marary avy amin’izy ireo no ahilikiliky ny mpitsabo maoderina rehefa manatona azy ireny ; kanefa efa nahazo alalana ireo mpitsabo ireo, hanatanteraka ny asany. Efa voasokajy ho isan’ny fomba fitsaboana azo tanterahina eto Madagasikara rahateo izy ity.
Etsy andaniny dia sarotra amin’izy ireo ihany koa ny mangataka alalana hanokatra toeram-pitsaboana na alalana hitsabo avy amin’ny tomponandraikitra sasany. « Misy ireo olona angatahana alalana no mampifandray azy amin’ny finoana ka mandà ny fanomezana izany. Ao ihany koa ny fangatahana alalana lasa olana be arakaraka ny toe-tsain’ny tsirairay », hoy hatrany ny Filoha. Nanazava anefa ny tenany fa fanomezam-pahasoavana, hahay hitsabo sy hanasitrana no azon’ireo mpitsabo ireo ka tsy tokony hambaniana.
Hametraka rafitra
Entina hamahana izany olana izany, sy hanapariahana azy ireo amin’ny toerana rehetra eto Madagasikara dia hametraka rafitra hanamorana ny asa izy ireo. Raha ny fanazavana dia efa tamin’ny taona 2024 no efa saika napetraka izany. Ao anatin’izany rafitra izany ny Komity nasionaly fakan-kevitra mikasika ny fitsaboana nenim-paharazana, eo anivon’ny Minisiteran’ny fahasalamam-bahoaka, ao amin’ny rafitry ny fitaleavan-draharahan’ny farmasia sy laboratoara ary ny fitsaboana nentim-paharazana (DPLMT). Manampy izany ihany koa ny Sampan-draharaha misahana ny zavamaniry fanao fanafody sy ny fitsaboana nentim-paharazana. Isan’ny mbola ho apetraka ihany koa ny birao rezionaly ho an’ity fitsaboana ity ary ny filan-kevitra kaominaly momba ny fitsaboana nentim-paharazana.
Raha ny fanazavana dia i Mahajanga, SAVA, Toamasina, irery ihany no efa amperin’asa ireo sampan-draharaha ireo. Ny ankoatra izay dia mbola eo amin’ny fanentanana amin’ny fametrahana azy.
