Fiompiana trondro : Mahatratra hatramin’ny 66 000 ireo efa nahazo fiofanana manerana ny Nosy

Olona miisa 66 000 voaofana

Tanjon’ny Minisitera amin’ny fampiofanana ny hanatsara ny lafiny fizakan-tena ara-tsakafo ho an’ny Malagasy, ka antony hanaparitahana izany amin’ny faritra rehetra. Amin’izao fotoana izao, raha ny nambaran’ny Minisitra dia olona miisa 66 000 no efa voaofana mikasika ity karazam-piofanana ity. Ny atsasa-manilan’izy ireo dia efa mpiompy avokoa amin’izao fotoana izao. Efa tsara io tarehimarika io raha ny fanazavana na dia mbola tsy ampy ny filàn’ny Malagasy trondro aza ny vokatra.
Nahitana fiakarany ny vokatra tilapia sy karpa raha 3 000 taonina izany taloha ary efa tonga 11 700 taona izy ankehitriny. Raha ny fanazavana anefa dia mbola misy tsy fahampiana eo amin’ny 130 000 taonina eo ny trondro satria 307 000 taonina no filàna kanefa mitotaly 177 000 taonina eo ho eo ny vokatra rehetra. Nanamafy ny Minisitra fa na dia efa niakatra aza io totaly io dia mbola tsy mahatratra ny tanjon’ny fizakan-tena ara-tsakafo izany. Antony indrindra hitetezana an’i Madagasikara amin’ny alalan’ny fampiofanana.

Mbola malalaka tsenan’ny seha-pihariana trondro

Toy ireo faritra sy toerana maro efa nitondrana ny fampiofanana dia nahasarika olona aman-jatony ny tao Mahajanga. Manodidina ny 282 ireo tanora sy renim-pianakaviana ary raim-pianakaviana tonga nanatrika izany, omaly. Nanamafy rahateo ny Minisitra fa mbola malalaka ny lalana amin’ity sehatra ity ao an-toerana, sy saika manerana ny Nosy.
Fampiofanana feno toy ny karazan'ireo fiompiana trondro miisa 4 miaraka amin'ireo teknika rehetra fanamboarana azy no nampitain’ny Minisitra tamin’izany. Tao anatin’izany ireo tsara ho fantatra rehetra toy sakafo. Vina ao anatin’izany ny hitomboan’ny isan’ireo mpisehatra amin’ny fiompiana trondro.