11 febroary 2025 : Feno 50 taona ny nitifirana ny Kolonely Ratsimandrava

Noho ny olana ara-politika ara-pahasalamana, natolotr'i Phillibert Tsiranana ny Jeneraly Ramanantsoa ny fitondrana, ny 18 may 1972. Niditra tamin'ny "Transition militaire" izany ny teto Madagasikara. Taorian'ny fitsapan-kevi-bahoaka ny volana oktobra 1972 nefa ity farany vao tena nandray ny fitondrana, izay nahazoany ny fahefana feno. Tamin'ny fitondran'i Ramanantsoa dia minisitry ny atitany ny Kolonely Ratsimandrava. Niavaka manokana izy tamin'ny nanomezany lanja ny "fokonolona". Nanome vahana ny famokarana sy ny asa teto an-toerana ihany koa ny tenany.
Noho ny krizy politika sy sosialy namaivay, nisy ny fandaminana isan-karazany notarihin'ny Jeneraly Ramanantsoa. Tsy nahomby nefa izany ka nisafidy ny nametra-pialana ny tenany, ny 5 febroary 1975. Ny andron'io ihany dia nandray ny fahefana ny Kolonely Ratsimandrava. Rehefa notendrena ny tenany, dia nanambara ilay fehezanteny malaza hahatsiarovana azy hoe "tsy hiamboho adidy aho Mon Général".

Nitondra an'i Madagasikara herinandro

7 andro monja no nitondran'ny Kolonely Richard Ratsimandrava dia nindaosin'ny fahafatesana ny tenany. Nisy nitifitra teny Ambohijatovo ambony izy, rehefa avy namonjy ny filankevitry ny minisitra teny Anosy. Azo lazaina izany fa voaomana ny namonoana azy, satria olona mahafantatra tsara ny fandaharam-potoanany sy ny lalany no nitifitra na naniraka mpitifitra. Misy kosa nefa ireo mihevitra efa teny amin'ny Birao fiasany no efa nisy savorovoro. "Efa voatifitra na maty tao amin’ny biraon’ny Jeneraly Gilles Andriamahazo izy vao niharahan’ny tifitra nolazaina fa tena nahafaty azy teo Ambohijatovo ambony", hoy ny Pr Françoise Raison Jourde, mpahay tantara frantsay.
50 taona aty aoriana, tsy mbola fantatra ny namono azy. May tao amin'ny Rovan'Andafivaratra tamin'ny 11 septambra 1976 moa ireo antontan-taratasy fanadihadihana mikasika ilay raharaha.
Taorian'ny nahafatesan'ny Kolonely Richard Ratsimandrava, ny Général Gilles Andriamahazo no nitantana ny firenena. Ny volana jona 1975 nefa, niala indray ity farany, ka i Didier Ratsiraka no voatendry ho filohan’ny Filan-kevi-pitondrana ambony momba ny Revolisiona.