Fetin’ny Krismasy : Ankizy miisa 72 ao anatin’ny Kamboty Ivelan’ny Akany nisitraka tohana nanaovana fety

Manan-jo ny hankalaza ny fetin’ny Noely toy ny karazan’olona rehetra ireto ankizy ireto, indrindra manoloana ny fahasahiranana sy ny fisondrotry ny vidim-piainana amin’izao fotoana izao. Izany indrindra no niarahan’ny Ministeran’ny mponina sy ny firaisan-kina tamin’ny Polisim-pirenena, nanatanteraka izany adidy izany. Ao anatin’ny fanatanterahana ny politikam-panjakana amin'ny fiahiana ny mahaolona rahateo izany asa izany.

Tokantrano miisa 40

Fotoana famalifaliana ny ankizy ny Fetin’ny Noely toy izao ; nahatsiaro ireo zaza kamboty misy mitaiza araka izany ny Polisim-pirenena, niaraka tamin’ity Ministera ity ka nanolotra fanomezana sy kilalao ho azy ireo. Tao anatin’izany ny fanomezana ho an’ny isaky ny ankizy sy « panier garni » ho an’ny tokan-trano miisa 40 izay hipetrahan’ireo zaza 72 ireo. Tao anatin’izany ny vary, gisa, menaka, paty sy ireo maro hafa. Teo ihany koa ireo fitaovana samihafa avy amin’ireo mpiara-miombon’antoka, nanampy izany fanomezana izany. Tonga nanotrona izany fotoana izany ihany koa ny solontenan’ireo zaza kambotin’ny Zandarimariam-pirenena ao Arivonimamo ho mariky ny fiarahana mandrakariva amin'ny Hery fiarovana sy filaminana.
Nanolotra ireo fanomezana ny filoham-boninahitry ny FIVAPOVA, Rakotoarimanana Faniry sy ny Filohan’ny FIVAPOVA Analamanga niaraka tamin’ny mpikambana. Nanome voninahitra ny fotoana ny Minisitry ny Filaminam-bahoaka, ny Contrôleur Général de Police, Rakotoarimanana Herilala sy ireo mpiara-miasa aminy, ary ny Talen’ny Kabinetran’ny Ministeran’ny mponina. Tamin’izany no nirariana soa hatrany ireo zaza kamboty sy ireo mpitaiza azy ireo amin’ny asa masina izay tanterahiny ho an’ireo ankizy ireo.